آخر دمعة ..molhm

ياليل مالك طويل

ياليل مالك طويل

ومفيش منك مفر

وياليل فين الحبيب

والأحلام و القمر

أنا كنت فاكرك ساعات

وهتيجي شمس النهار

تفتح شباك لقلبي

على أفراح البحار

ياليل ليه فجأة طلت

وعليا يا ليل كدبت

ووقفت ليه فوق جراحي

وزي البريئ ابتسمت

****

مرت أيام طويلة

و أنا عايش ف الخيال

برسم ف عيون جميلة

هتشاركني الأمال

ولما لقتها قصادي

قلت انتهت الدموع

وخلاص الليل هيرحل

ف طريق مفيهوش رجوع

لكني تاني اكتشفت

أني لحزني أتخلقت

لما اترجيت لقاها

ولقتني اترفضت .

لقتني اترفضت ..

********

أنا ليه يا ليل كده

حساس بالشكل ده

وليه مش بعرف اكدب

و أداري الحزن ده

ولا معدتش تفرق

إيه يعني حزني يظهر

هو فيه حد أصلا

فيا ممكن يفكر

ده أنا عايش ف الحياة

ف الزحمة لكن وحيد

فيا من النار الآآمها

وفيا سكوت الجليد

أصعب إحساس تحسه

أنك تعطش لحد

يحضن قلبك يحبك

ومفيش ولا أى حد

و مفيش ولا أى حد

و مفيش ولا أى حد

ومفيش ولا أى حد

ومفيش و لا ....


بقلم:ملهم

11-5-2009

التاسعة مساءاً

يااااااااااااااااااااااااااااا

دانتا شكلك متبهدل يابنى
ربنا يكون فى عونك
..............................................petoo///!!!!!!!

هه

مش بالظبط

بس معاك ف إن ربنا يكون ف عوني

وبليز بلاش اسلوب الرد ده علشان بيضايقني

ok my friend
just donot be angery
any way iam sorry

............ ........ ..........petoo//**

وليه مش بعرف اكدب

و أداري الحزن ده

ولا معدتش تفرق

إيه يعني حزني يظهر

هو فيه حد أصلا

فيا ممكن يفكر

ده أنا عايش ف الحياة

ف الزحمة لكن وحيد

فيا من النار الآآمها

احساس جميل جدااا ..

حلوة يا معلم..احلى ما فيها..طازة
بس كشاعر محترف لازم تتطلع الى ما هو اكثر..
الوزن انكسر كتير..تمن مرات ينكسر الوزن مش شوية
الافكار الكلية في المقاطع التلاتة..ترابطها ضعيف تحس انك بتقرأ تلات قصايد
لكن طبعا تبقى لغة الكتابة راقية
وتبقى المشاعر فياضة و واصلة كويس
وتبقى القوافي جميلة جدا
..
استمر

شكرا لكل الناس اللى مرت

_________

الفارس


تانى تانى تانى حنروح للحب تانى ..
و النار و العذاب من تانى
و تانى تانى تانى حنروح للحيرة تانى
و نضيع و نجرى ورا الأمانى

ويغيب القمر ونعيش السهر ..
و آهات الألم فى ليالى الندم
يا ليل يا حضن السهارى ..
يا للى شفت فى عينيه الدموع
و أنا دايما راجع وحيد
يا ليل يا حضن السهارى ..
خلى فجر الحب يطلع بدرى
يملا مشوارنا الجديد

من أغنية موعود كلمات محمد حمزة

تعتقد أن تغير النغم من فقرة للتانية هنا نقدر نسميه كسر!!!

الأمر ف العامية بيختلف

تعتقد أن العامية بتنكتب على بحر واحد؟

إيه بحور شعر العامية المصرية أصلا؟...؟


شكرا على اهتمامك الكبير في القراية ردك

بيقول انك قريت كويس جدا وده شيء يسعدني


وفعلا انا بكسر الوزن كتير خصوصا ف الفصحى

لاني حتى مش بتعمده لما بكتب هو بيجي كده..لو مجاش خلاص

ثانيا :بالنسبة لموضوع شاعر ده

انا مش شاعر ..

وف رأيي أن اللى بيعتقد انه شاعر علشان كتب شوية كلام موزون

وشوية ناس مدحوه ولا سقفوا له

ميعرفش حاجه

شاعر دي حاجه كبيرة قووي

و اظن ان طه حسين كان مثل للموضوع ده ومحمود درويش لما كان بيتكلم عن بدايته إللى اتنكر لها بعد كده


وكتير من الناس اللى ف صغرهم كانوا بيعتقدوا انهم بيكتبوا شعر لكن لما عرفوا اكتر

اكتشفو انهم كانوا مخدوعين ..

الموضوع بالنسبة لي تسلية وترويح عن النفس مش اكتر (بكتب كأني باخد بتنهد وبس)
علشان كده عمري لا فكرت اشارك ف نشاط ادبي زي ف الكلية مثلا ولا هفكر

رغم انحطاط المستوى هناك برده



شكرا يا مصطفي على مرورك

و اهتمامك الكبير

يا عيني
القاضي بنفسه نزل لشعر العاميه
اهلا بيك في وطنك
بس يا ريت تملى استمارة عضوية شعر العاميه هيه مش سايبه
بس بجد تمام يا معلم