راجعة ليه..؟؟؟

راجعة ليه..؟؟؟

وانصدمت.. وقلبي فجأه لقيته واقف..

صاعقة نزلت فوق دماغي مرة واحدة..

مستحيل..مش ممكن ابدا اني شايف..

اللي ماتت..تاني راجعة..تاني راقدة..

قلبي حسيت انه فعلا منها خايف..

لسه فاكر طبعا الماضي اللي عدى..
* * * *
وانصدمت وصاعقة نزلت فوقي تاني..

لما حسيت انها علشاني جاية..

وانصعقت بحضنها..مفتوع عشاني..

وابتسامة ف وشها معمولة ليا..

والصواعق استمرت فوق وداني..

لما صوتها..لقتها بيه بتنده عليا..
* * * *
صوتها روعة زي صوت مزمار صاحبنا..

اللي جمع بيه فران كل المدينة..

زي سم وفوقه قشطة وفوقها لبنة..

زي زفت ف وسط ارض ترابها طينة..

ودني جت و معاها قلبي وقالوا: دبنا..

قمت مديّر وقايل: يلا بينا..
* * * *
يا حبيبي انته رايح ليه ..وفين..؟؟

اوعى..اوعى تكون نسيت كل اللي كان..

لما كان قلبك مغرقني بحنين..

لما كان حضنك مغرقني بحنان..

رحت باصص تاني ليها...انتي مين؟؟

احنا كان بينا كلام ايام زمان..؟؟
* * * *
ايه يا عمري انته ناسي ولا ايه؟؟

ناسي ماضينا الجميل والذكريات؟؟

ماضي ايه اللي انتي جاية تقولي فيه..؟؟

ماضي جرح..ونار خيانة..وحب مات..

ماضي باين إن انتي اللي نستيه..

زي ما نسيتي الحبيب وسط الاهات..
* * * *
لما سبتي قلبي مرمي ف وسط غابة..

غابة سودة معشقة بريحة نتانة..

قلبي اللي بيكي كان مغرم صبابة..

جبتي اخره..وهدتيه بنار الخيانة..

تنهشه ف الظلمة انياب الديابة..

تحرقه في وسط الضياع نار الاهانة..
* * * *
مش نسيت..لكن توقعت السماح..

لما تلقاني ندمت وراجعة واقفة..

بعترفلك ان انا سبب الجراح..

واني فعلا من صميم القلب اسفة..

انسى ارجوك الخيانة واللي راح..

انسى لو كان لسه عندك باقي رأفة..
* * * *
اللي فات مفهوش ولا ذرة افادة..

مش حرام عمرك يضيع ؟؟ ياخي فداه..

حبنا صدقني هايجيب السعادة..

"السعادة"..فتحت بؤي وقلت: يااه..

كلمة حلوة بس يعني بقت معادة..

مش عايز منك سعادة ولا حياة..
* * * *
دمعت وقالتلي بس بصزت حزين:..

بس حبك لسه ساكن جوا دمي..

في سماحتك؟؟فين حنان القلب فين؟؟

هتلاقيه دلوقتي جوا القبر مرمي..

بين آلامي بين جراحات السنين..

جنب صورتك..جنب حبك..جنب حلمي..
* * * *
قلبي يومها مكانش مات كان لسه حي..

كان بيتعذب بنار حبه القديم..

يومها قاللي ان السماح دا مالهش زي..

والمسامح طول حياته واحد كريم..

قمت ماسكه من سكات وكويته كوي..

مش هطفي نار جراحي ..بالجحيم..


...الفارس

فعلا جميل يا من
بس انا عاتب عليك فى الصور الى استخدمتها فى


.....................................
اللي جمع بيه فران كل المدينة..

زي سم وفوقه قشطة وفوقها لبنة..

زي زفت ف وسط ارض ترابها طينة.

.................................

ليه بس يا زعيم الصور دى
دا الكلام كله فى الجون

كلمة حلوة بس يعني بقت معادة..

مش عايز منك سعادة ولا حياة..

جميله يا مان

فيه صور لا تليق بالجرح_________اذكر للجرح العذاب
اسلوبك كويس جدا
واسلوب العامية بيريح ناس كتير

تمام

هو احساسك كويس وصادق..
بس انا من راي انه فيه كلمات بالعاميه البحتهٍٍ (باصص)..وفيه كلمات باللغه العربيه الى حد ما(بالجحيم)..
فحاسه انه مفيش تناسق بينهم .. وفيه صور مش محببه في الشعر ده خصوصا انه احساس حزن وفرح ولهفة..
يعني الصور دي مش لطيفه في النوع من الشعر ده..
بس بحيك على احساسك..

شكرا ليكو كلكو يا جماعة

GA3LONE MOHANDESAH كتب:هو احساسك كويس وصادق..
بس انا من راي انه فيه كلمات بالعاميه البحتهٍٍ (باصص)..وفيه كلمات باللغه العربيه الى حد ما(بالجحيم)..
فحاسه انه مفيش تناسق بينهم .. وفيه صور مش محببه في الشعر ده خصوصا انه احساس حزن وفرح ولهفة..
يعني الصور دي مش لطيفه في النوع من الشعر ده..
بس بحيك على احساسك..

شكرا يا برنس
بس في حاجة عاوز اوضحهالك..مش قصدي ان ادافع عن القصيدة
انته اللي تحكم مش انا
لكن بالنسبة لاستخدام كلمات عامية مع كلمات فصحى فدي حاجة عادية جدا
خاصة ف العامية المصرية
و لو خدت بالك من الكلمات اللي باللون الاحمر فوق هتلاقيهم بالفصحى