أنا شوفتك فين !!
إحساسي بيقول إني عارفك من سنين
بس مش فاكر
يمكن بعرفك من واحنا لسه صغيرين
يمكن زمان قابلتك مره مرتين
تعرف حبيبي
يمكن عمرنا ما اتقابلنا
بس فيه إحساس آخدنا
يا عالم آخدنا لفين
حاجات كتير قالتلي بعرفك
تفتكر
ممكن نكون لبعضنا مكتوبين
ياريتك تقولي
إنت كمان شوفتني ولا أول مره
وكانت إمتي وفين
بقول جايز تكون إنت الملاك اللي كان في الحلم
انت اللي كان أبيض ف أبيض وزي ما يكون بجناحين
أنت اللي كان بيلحقني قبل الأذي ما يتم
وساعات كتير كان ياخدني يضمني
أد إيه كانت إيديه حنينين
علي كل حال مش هو ده المهم
المهم إنك دخلت قلبي مرتين
مره من دلوقتي
ومره عايز أفتكرها
قول تعبت...
إفتح لي قلبك وإتكلم قول كل حاجه أنا سامعك
قوللي عاللي بيسعدك وعاللي بيخليك فرحان
أنا حاسس إني هاقدر أبقي عند حسن ظنك
وأكتر من الكلام
جرب
مش هاييجي يوم تكون خسران
أنا من زمان وانا نفسي في حد زيك
طمنني
قول إنك عارفني
قول أننا كنا واحد وإتقسم نصفين
عرفتك حبيبي تبقي مين
إنت نصفي التاني اللي إنكتبلي قبل ما آجي الدنيا
انت اللي مكتوب ع الجبين
و قبل ما تقول شوفنا بعضنا فين بحبك
... بحبك وبكره تفتكر كلام العنين